Pizza - pizzubotn

Þessa uppskrift af pizzubotni hef ég notað í áratugi. Deigið nægir á heila ofnbökunarplötu svo uppskriftin hentar líka í 2 miðlungs hringlaga botna

Uppskrift

Innihald

300 gr hveiti
1 msk instant ger
1/4 tsk salt
1, 5 dl vatn (38°C)
2 msk olívuolía
1 egg

Aðferð

• Blanda saman hveiti, geri og salti í skál.
  
• Bæta vatni, olíu og eggi í skálina.
• Hræra öllu saman og hnoða síðan í 10-13 mínútur.
• Setja hreint viskustykki eða disk yfir skálina.
• Láta deigið lyftast í 30-40 mínútur (fer eftir hitastigi innanhúss).
• Nú passar að kveikja á bakaraofninum og hita í 220°C.
  
• Setja örlítið hveiti á borðplötu og moka deiginu varlega í einu lagi út skálina yfir á borðplötuna. Varast að kremja loft úr deiginu við þennan flutning. Ef skipta á deiginu í tvo botna er það gert núna.
  
• Þrýsta með öllum fingrum 2-3 sinnum á deigið svo úr verði þykk skífa. Þetta losar svolítið af lofti úr deiginu. Það á ekki að hnoða deigið aftur. Leggja viskustykki yfir deigið og láta deigið hvíla í 5 mínútur. Hvíldin gerir það auðveldara að fletja deigið út án þess að það skreppi jafnóðum aftur saman. Upplagt að rífa ostinn á meðan.
• Fletja deigið út með kökukefli. Reyna að rúlla eins sjaldan yfir og hægt er og ekki þrýsta fast með keflinu.
• Flytja deigið yfir á bökunarplötu sem klædd er með bökunarpappír. En það má líka fletja deigið út á plötunni eða á pappírnum til að auðvelda flutninginn.
  
• Sósa, ostur og fylling sett á pizzuna.
• Pizzunni skellt í ofninn þegar 20-25 mínútur eru liðnar síðan deigið var flatt út.
• Baka í 13-15 mínútur. Það fer svolítð eftir þykkt botnsins og magni áleggsins.
  

Ég læt hrærivélina um að hnoða deigið en það er ekkert að því að hnoða í höndunum nema úthaldið skorti. Það þarf ekki krafta til að hnoða þetta deig heldur er það tæknin sem skiptir máli. Hnoðun snýst ekki um að kreista deigið eins og ég hélt einu sinni heldur að teygja á því. Þannig byggir glútenið upp þanþolið og bindingu lofts sem gerir brauðið mjúkt og loftmikið eftir bakstur.

Þegar álegginu er raðað á pizzuna finnst mér betra að hafa minna á því í miðjunni svo deigið geti betur lyft sér og botninn bakist jafnar. Auðvitað er best ef maður kemst upp á lag með að fletja deigið út með höndunum í stað þess að nota kökukefli en ég kann það ekki. Þá verða kantarnir þykkari sem sem heppilegra fyrir jafnari bökun. Þá má líka leika sér með að bera kryddolíu á kantana strax og pizzan kemur úr ofninum.

Það má minnka þessa uppskrift með smávægilegum breytingum:  

200 gr hveiti
2 tsk instant ger
1/4 tsk salt (tæplega)
1 dl vatn (38°C)
1 msk olívuolía
1 egg

Gulrótarsúpa

Það hefur lengi verið stóra planið að elda súpur. En það hefur verið lítið um efndir hjá mér. Sjáum hvað setur. Þessi gulrótarsúpa er bragðmikil og hressandi, gleðjandi á litinn og flauelsmjúk á tungu.

Uppskrift fyrir 4. Magn 8 d af súpu.

Innihald

400 gr gulrætur
1 paprika, rauð eða gul
1 msk ólívuolía
¼ tsk cumin
1/8 tsk cayenne pipar
1/8 tsk karrý
1 hvítlauksrif
½ lítri kjúklingabeinasoð eða hálfur soðteningur
¼ tsk salt, ef þarf
1 msk kalt smjör

Aðferð

1. Gulrætur flysjaðar og skornar á ská í ½ cm þykkar sneiðar.
2. Paprika hreinsuð og skorin í bita.
3. Hvítlaukur rifinn eða skorinn smátt.
4. Olía hituð á miðlungshita og laukurinn látinn malla í nokkrar mínútur þar til hann mýkist. Varast að láta laukinn brúnast.
5. Kryddunum og hvítlauknum bætt í og steikt í 30 sekúndur á meðan hrært er rólega í.
6. Gulrótum og papriku bætt í og látið mýkjast í 2 mínútur, hræra í af og til.
7. Soði bætt í pottinn og suðunni komið upp. Smakka á soðinu og salta ef þess þarf.
8. Sjóða súpuna í 20-25 mínútur eða þar til gulræturnar eru orðnar meyrar.
9. Súpan látin kólna í 15 mínútur og þá ausið í blandara til að mauka hana eða maukuð með töfrasprota í pottinum.
10. Smjörinu bætt í og maukað stutt saman við.

 

Smjörið gerir súpuna kremkenndari og bætir áferðina án þess að trufla litinn. Mér finnst gott að bæta klípu af sýrðum rjóma út á súpuskammtinn minn í disknum en súpan er alveg jafngóð án þess. Ef enginn er blandarinn til skal ekki gráta það heldur borða súpuna eins og hún kemur fyrir. Þetta er ódýr súpa í eðli sínu. En það má gera hana enn ódýrari með því að sleppa paprikunni og nota þá 1 tsk af paprikudufti ef maður vill. Einnig má bæta í hana kókosmjólk eða kókosrjóma sem hækkar þá hráefnisverðið.